Perron
Das isch s Lied vo de Lüüt
wos Läbe lang ufem Perron stönd
will sie sich nöd entscheided
obs bliibed oder gönd
Es Päärli nimmt Abschied
er luegt ihre nah
ob sie luegt, gseht er nöd
es spieglet nu sin Bart
En Touri frögdn nachem Wäg
isch froh, woner ihm d Charte dräht
umbedingt gseh ha? mummer
s Panorama am Mythequai
Amene Stand verchaufeds Cafi
Redbull und belgischi Waffle
Einehalbliterfläsche und
drüü Dezi Wasser
En Schnällzug fahrt verbii, wirblet e
Gratisziitig uuf
zwüsched d Gleis ligged Stei
eine isch e Muus
Das isch s Lied vo de Lüt
wos Läbe lang ufem Perron stönd
will sie sich nöd entscheided
obs bliibed oder gönd
De Tamil schwitzt fründlich
zwüsched Bratwürscht und Cervelats
Gaschtfründschaft isch
s Markezeiche nöd nu vo däre Stadt
Am Kiosk händs eine umbracht
staht i drüü grosse Wort
wiiter hinne stecked d Pornos
zvorderscht vorne liit de Sport
E Frau mit grosse Brüscht
und chliine Hünd ufem Arm
studiert i goldige Moonboots
de elektronisch Fahrplan
D Rollträppe verschwindet
imene gschpränklete Bode
a mim Geburtstag
hät mer de Bancomat s Chärtli inezoge
FACEBOOK
INSTAGRAM
VIMEO