Chriegserchlärig

 

1

Ahgriff isch die bescht

Verteidigung – d’ Frag isch

wär sich beteiligt und

ob oisi Sprach gnueg klar isch

 

mi sind bereit

au wänn die ganz Wält verseit

es git eine über ois

wo d’ Verantwortig treit

 

mi döffed de Chopf

jetzt nöd in Sand stecke

es bestaht immer no d’ Hoffnig

dass me Massevernichtigswaffe entdecked

 

oise Standpunkt

mümmer durrestiere

wämmer ine jetzt Bei mached

gits nachhär weniger z’ amputiere

 

d’ Wahrheit tut weh

aber mir händ e gueti Armee

und es muess niemer Fernseh luege

wo kei Bluet cha gseh

 

d’ Meinige sind gschpalte

mi leged oisi offe dar

wär sini im Gheime phalted

bliibt für all e Gfahr

 

ich bring Wii und Hoschtie

für e grosses Abigmal

ich hoff, mi chönd si stoppe

wie in Hiroshima

 

es git pro und contra

das möchti betont ha

aber wär ufrüschtet wie mier, dä

muess au ad Front gha

 

2

mi üebed

Grächtigkeit

bis mers perfäkt druffhänd

trotzdem chas passiere

dass sich en Unschuldige id Luft sprängt

 

zerstreuti Mänsche

mit Spruchbänder

sind guet für e Demo

en Präventivchrieg gwünsch aber nöd

mit Lieder vom John Lennon

 

es bruucht

Propaganda und Stratege

wo Abstand näh chönd

und Rakete

 

Sprängchöpf und Querdänker

wo nöd wahllos

jedem Drittwältland

Beachtig schänked

 

es bruucht gezielti Ahgriff –

wänns es Spital trifft

schicked mer de Verletzte

e Tonne Malstift

 

will oisi Töchtere und Söhn

sind eh so verwöhnt

die wüssed nidemal meh

wine Bombe tönt

 

3 

jetzt mümmer

all am gliiche Strick zieh

und d’ Unterschied vergässe

oisi Wärt gönd über

nationali Interässe

 

mi bruuched Wiitblick und Glaube

wi de Jesus am Chrüüz

jede Mänsch isch dienschttauglich

wänner sis Huus verlüürt

 

als überzüügti Chrischte

ghört ois d’ Luftherrschaft am Himmel

lönd oi nöd blände

es muess au ufem Bode stimme

 

es bruucht e Lischte

mit allne Pazifischte

bevors ois de Plan verpatzed

meh Platz i oisne Chischte

 

s’ Militär

cha nöd überall si

wänns prekär wird

mischemer ois überall dri

und bringed ine notfalls d’ Demokratie bi

 

wege zwei Wulchechrazer gheit ois känn

Zacke us de Chrone

e Gägeattacke

würd sich für ois sogar lohne

 

oisi Schulde wachsed

wämmer si jetzt nomal schoned

bliibts e offeni Rächnig

für Generatione

 

4 

Wär hebbt hüt no

die ander Bagge ane?

Gott beschütz ois!

mi haued was grad ahstaht id Pfanne

 

au wänn ois de Satan

dur d’ Lappe gaht –

fescht staht

oisi Jagdgründ sind ewig

mi finded sis Reservat, kämpfed

 

für d’ Mänscherächt bis zum

letschte Ma

ich dänk a Vietnam

die sind hüt besser dra

 

für oisi

breit Unterstützig

simmer berüchtigt

Flüchtling wüssed oft nöd, dass de

Chrieg au Frücht bringt, mi hälfed de

 

Chinde und Fraue

wiederufzbaue

das verbindet über d’ Gränze

und schafft Vertraue

 

es git no

vill z’ lärne

für de Friede uf Ärde

kei Drohgebärde isch z’ gross fü oisi Härde

 

mi münd no

vill Opfer bringe und

Gospel singe aber

niemer cha d’ Gunscht

vo Gott erzwinge

 

drum

warted nöd uf Wunder

und höred uf Predige, Ziit

heilt alli Wunde

jetzt mümmers erledige!